Серікбол Қондыбайдың 55 жылдығы "МИФОЛОГИЯ МҰЗЖАРҒЫШЫ" тақырыбындағы ғылыми-танымдық кездесу

28 наурыз күні Серікбол Қондыбайдың 55 жылдығы  "Мифология мұзжарғышы" тақырыбындағы ғылыми-танымдық кездесу  өткізілді. Бұл кездесудің маңызды сипаты - ғұмырының жартысын қазақтың тарихын, мәдениетін, салт-санасын жаңғыртуға арнап, сүбелі үлес қосқан және түбегейлі зерттеуде зор еңбек еткен қазақтың өлкетанушы, географ, публицист, этнограф-ғалымы, ұлтын ұлықтаған ұлы тұлға туралы ғылыми-танымдық кеш. Кеш барысында Серікбол Қондыбай туралы қысқаша видео көрсетіліп, баяндама оқылды.

Ғылыми-танымдық кездесуге арнайы шақырылған қонақтар:

- Балсұлу Қондыбай – Серікбол Қондыбайдың апасы, педагог, ҚР «Білім беру ісінің үздігі»;

- Мұрат Ақмырзаев – педагог, жазушы, өлкетанушы «Адай уезінің жазба мұралары» атты кітаптың авторы;

- Рима Бердиева – Серікбол Қондыбай мемориалдық мұражайының директоры;

- Нұртай Айтжан - Серікбол Қондыбайдың құрдас-замандасы;

Сондай-ақ Маңғыстау гуманитарлық колледжінің студенттері. «Маңғыстау телеарнасы» және «Маңғыстау» газетінің тілшілері.

Кеш барысында өнерлі қыздарымыз Артурқызы Әнел және Ізбас Гауһар жетіген ұлттық аспабымен әдемі ән мен күмбірлеген күй орындады.

Серікбол Қондыбай– қазақ мифологиясының зерттеушісі. Ол бар болғаны 36 жыл өмір сүрсе де қазақ халқының тарихи санасын қалыптастыруда биік мақсат, ұлттық мүдде тұрғысынан қыруар жұмыс тындырған азамат. Сондықтан да, оның ғылымға, мәдени тарихымызға қосқан зерттеулері жоғары бағаға ие. Айрықша айта кетерлігі, Серікбол Қондыбай өзіне дейінгі ғалымдардың тісі бата қоймаған осы қиын да күрделі, терең де ауқымды мәселеге тайсалмай қалам тартты. Жас ғалымның қазақ мифологиясының табиғатын ашу мақсатында оны тілдің құрылымы тұрғысынан зерттеудегі, атаулар мен есімдердің мифологиялық астары мен мазмұнын танудағы еңбегі өзінің жоғары бағасын ала білді.

Таңғажайып дарынымен, жасампаз ерлігімен жұртты таңданта табындырған тұлға. Сұңғыла азаматтың сәулелі ой, сезімтал санасы “Талантта туған күн бар да, өлген күн жоқ” деген тіркесті толық дәлелдеп кетті. Қазақ мифологиясын алғашқылардың бірі боп зерттеу арқылы салаға ой-пікірін қосқан ғалымдардың бірегейі болғандығы туралы келген қонақтар өлкетанушы Мұрат Ақмырзаев, апасы Балсұлу Қондыбай, сырлас құрдасы Нұртай Айтжан және мұражай директоры Рима Бердиева ғылыми-танымдық, өнегелі пікір айтты.